Sjónvarpsveturinn skýrist

Haustdagskrá sjónvarpsstöðvanna er smám saman að skýrast. Spaugstofan er gengin til liðs við Stöð 2 en tilkynnt hefur verið um fimm aðrar leiknar þáttaraðir.

Stöð 2 verður sem fyrr með flestar leiknu þáttaraðirnar. Sjónvarpsstöðin stendur auðvitað frammi fyrir þeim „vanda" að engin vaktar-sería verður í ár en vinsældir þeirra eru einsdæmi í íslenskri sjónvarpssögu.

Spaugstofan var flokkuð sem leikið efni hjá RÚV og fellur eflaust undir þann flokk hjá Stöð 2 en auk hennar má nefna Steindann okkar.

Tökur á þeim þætti eiga að hefjast á haustmánuðum en þættirnir nuta mikilla vinsælda á síðasta tímabili.

Þá má ekki gleyma Mér er gamanmál, nýrri sjónvarpsþáttaröð með Frímanni Gunnarssyni þar sem hann heimsækir grínista á öllum Norðurlöndunum og í Englandi en Gunnar Hansson verður auðvitað í hlutverki ólíkindatólsins.

Pressan II er einnig í farvatninu en fyrri þáttaröðin þótti heppnast með eindæmum vel. Sigurjón Kjartansson situr sveittur við handritsgerðina en líklegt verður að teljast að stór hluti leikhópsins úr fyrstu þáttaröðinni snúi aftur. Tökur eiga að hefjast í kringum áramótin.

Ekkert lát verður heldur á hefðbundnari leiknum þáttaröðum hjá Stöð 2. Hlemma Vídeó er ný þáttaröð með Pétri Jóhanni Sigfússyni, Ágústu Evu Erlendsdóttur og Vigni Rafni Valþórssyni í aðalhlutverki.

Tökur á þeim þáttum eiga að hefjast á allra næstu dögum en hún segir frá ungum manni sem erfir myndbandaleigu. Hann sjálfur gengur þó með þann draum í maganum að verða einkaspæjari.

Handritsgerðin er í höndum Sigurjóns Kjartanssonar, Maríu Reyndal, Ara Eldjárn, Hugleiks Dagssonar og Péturs Jóhanns en leikstjóri er Styrmir Sigurðsson.

Skjár einn hyggst endurvekja leikið efni hjá sér eftir nokkurt hlé. Baldvin Z framleiðir nýja gamanþáttaröð undir heitinu Hæ Gosi sem er með bræðrunum Kjartani og Árna Pétri Guðjónssonum í aðalhlutverkum. Þættirnir voru teknir upp á Akureyri.

Langt er síðan Skjár einn var með leikið efni, eflaust var það Venni Páer sem hélt þeim fána á lofti, en þessi nýjung stöðvarinnar er mikið fagnaðaraefni.

Eins og Fréttablaðið greindi frá í gær mun RÚV sýna nýja sjónvarpsþáttaröð úr smiðju Friðriks Þórs Friðrikssonar sem heitir Tími nornarinnar og er byggð á samnefndri bók Árna Þórarinssonar.

Ekki liggur fyrir hvort aðrar leiknar þáttaraðir eru í undirbúningi en Skaupið verður að sjálfsögðu á sínum stað í leikstjórn Gunnars Björns Guðmundssonar.

freyrgigja@frettabladid.is