Jón Ólafs reynir við Elite-keppnina á ný

„Tíminn var bara of naumur fyrir stjórnvöld að taka á málinu,“ segir Jón Ólafsson, vatnsbóndi með meiru. Athygli vakti þegar fjölmiðlar fluttu fréttir í maí af því að forsvarsmenn Elite-fyrirsætukeppninnar á Íslandi hefðu hug á því að halda Elite Model Look World í nóvember á þessu ári. Jón reynir nú að fá að halda keppnina á næsta ári.

Skipaður var stýrihópur um málið á sínum tíma en hugmyndin kviknaði þegar Jón var öskutepptur í Frakklandi af völdum eldgossins í Eyjafjallajökli. Jón sendi þá póst til góðvinar síns og forstjóra Elite, Bernard Hennet, en skipuleggjendur voru í miklum vanda vegna þess að stjórnmálaástandið í Taílandi, þar sem keppnin átti að vera, þótti ótryggt. Keppnin var svo haldin í Kína eftir miklar bollaleggingar.

Jón segir að á þessum tímapunkti hafi menn ekki verið að hugsa um fyrirsætukeppnir, á Íslandi hafi verið hálfgert öngþveiti út af eldgosinu í Eyjafjallajökli og allar hugmyndir gengu út á að bjarga sumrinu og byggja upp ímynd Íslands. „Ég held að það hafi tekist mjög vel og ég er mjög ánægður með það,“ segir Jón.

Ísland er þó ekki eitt um hituna því Suður-Afríka og Taíland hafa óskað eftir því að fá að halda keppnina að ári. „Menn þurfa að sýna fram á að það sé stuðningur við verkefnið heima fyrir.“ Jón bætir því við að keppnin gefi miklar tekjur af sér, henni fylgi mikið af túristum og þá sé þetta gott fyrir ímyndina en á næsta ári á að spýta í lófana hvað markaðssetningu varðar og fjölga þeim löndum sem sýna keppnina beint. Talið er að yfir þúsund manns fylgi keppninni beint og um 400 milljónir manna horfi á keppnina um allan heim.

- fgg