Vinir Haim segja að hann hafi ekki tekið of stóran skammt

Fyrrverandi unglingastjarnan Corey Haim sem lést í gær tók ekki inn of stóran skammt lyfja að því er vinir hans fullyrða. Þeir segja að Haim hafi verið með flensu dagana áður en hann lést og umboðsmaður hans segir að hann hafi verið hættur að ofnota lyf, en Haim hafði barist við fíkniefnadjöfulinn í fjöldamörg ár.

Móðir hans, sem hefur búið hjá honum undanfarið á meðan hún berst við krabbamein, hringdi á lækni þegar Haim fékk flensuna sem skoðaði hann og sagði að allt væri í lagi. Nóttina eftir vaknaði hann og kvartaði yfir svima og skömmu síðar missti hann meðvitund og lést. Umboðsmaðurinn hefur ásakað sjúkraflutningamennina um að hafa verið allt of seina á staðinn en tuttugu mínútur liðu frá því hringt var á sjúkrabílinn og þangað til hann kom.

Vinur Haim og nafni, Corey Feldman mætti í viðtal hjá Larry King í gær og bað fólk um að hrapa ekki að ályktunum og slá því föstu að Haim hafi látist af of stórum skammti. Áður en krufningaskýrsla liggur fyrir er ekkert hægt að fullyrða, sagði Feldman.