Klámmyndastjarna segir Tiger Woods faðir launsonar

Nýr kafli byrjaði í hinni endalausu hjákonusögu Tiger Woods í dag. Þá tilkynnti klámmyndastjarnan Devon James með tilheyrandi látum að Tiger Woods væri faðir sonar hennar. Slúðursíðan öfluga RadarOnline greinir frá þessu.

Samband Tiger og Devon James átti sér að vísu stað áður en hann giftist hinni sænsku Elin Nordegren og umræddur sonur fæddist árið 2001. Þá hefur Tiger ekki gengist undir faðernispróf vegna þessa. RadarOnline greinir aftur á móti frá því að drengurinn sé afar líkur Tiger.

Devon James segist hafa greint golfaranum frá syninum árið 2006. Þau hafi átt vingott í um tvö og hálft ár í kringum aldamótin. Segir hún Tiger einnig hafa greitt henni og annarri stúlku nokkur þúsund dollara fyrir þríleik eina nóttina. Engar sannanir eru aftur á móti fyrir hendi.

Tiger verður áfram í sviðsljósinu á næstunni þegar hann spilar á US Open. Eiginkona hans er nú stödd í Kína með syni þeirra tvo í heimsókn hjá bróður sínum.