Lífið

Sólinn frá Sandgerði á svið

Halldór gylfason Eða Kiddi Casio, söngvari Sólans frá Sandgerði.
Halldór gylfason Eða Kiddi Casio, söngvari Sólans frá Sandgerði.

Hátíðin Aldrei fór ég suður fer að vanda fram á Ísafirði um páskana. Tilkynnt hefur verið um fyrsta holl skemmtikrafta sem fram kemur. Þar á meðal er hljómsveitin Sólinn frá Sandgerði, sem varð fræg í Vaktarþáttunum. Ólafur Ragnar var umboðsmaður sveitarinnar á tímabili og hafði stórar væntingar. Nú kemur Sólinn fram í fyrsta skipti opinberlega.

„Þeir hjá hátíðinni höfðu nú bara samband og vildu að Sólinn tæki lagið, það var ekkert flóknara en það," segir Kiddi Casio, e.þ.s. Halldór Gylfason, söngvari sveitarinnar og aðalsprauta. „Þetta er kærkomið því Sólinn er frábær hljómsveit og það er gott fyrir þennan grænmetisétandi lopapeysuskríl sem verður þarna, að sjá einu sinni almennilega hljómsveit sem FÓLKIÐ fílar."

Júlíus Brjánsson á yfir höfði sér lögbann vegna auglýsinga sem hann lék í því karakterinn þótti minna of mikið á pabba Ólafs Ragnars í Vaktarseríunni. Halldór segist ekki vera búinn að fá leyfi til að koma fram með Sólinni. „Kannski verður Sólinn stöðvaður af, ég bara veit það ekki. Ég spurði Jörund um leyfi og hann gaf allavega grænt ljós. Ég þarf að spyrja Jón Gnarr líka næst þegar ég hitti hann. En ef þetta gengur vel þá verður náttúrlega leigð rúta í sumar, gefin út plata og jólalag og lokatakmarkið er svo auðvitað að fara í Eurovision."

Aldrei fór ég suður-hátíðin mun í ár teygja sig út um allan bæ og myndlist, uppistand og fleiri viðburðir verða um allan Ísafjörð. Uppistandshópurinn Mið-Ísland mætir, en rokkið verður sem fyrr mest áberandi. Grugg-hljómsveitin Urmull kemur fram í fyrsta skipti síðan um miðjan 10. áratuginn, en í bandinu voru gaurar sem síðar áttu eftir að láta til sín taka í hljómsveitunum Buttercup, Ampop, Dimma og Reykjavík! Í fyrsta hollinu var einnig tilkynnt um að Bloodgroup, Hjaltalín, Morðingjarnir, Rúnar Þór, Dikta, Pollapönk, Ólöf Arnalds og Hudson Wayne kæmu fram.- drg






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.