Skólastjóri í alþjóðlegum barnaskóla í Kambódíu

Steinunn Jakobsdóttir útskrifaðist með meistaragráðu í þróunarfræði frá UCD háskólanum í Dublin síðustu jól og starfar nú sem skólastýra í alþjóðlegum barnaskóla í Phnom Penh í Kambódíu.

„Ég dvaldi hér í þrjá mánuði síðasta sumar þegar ég vann að meistaraverkefninu mínu og vann þá á munaðarleysingjaheimili í Phnom Penh. Mér fannst yndislegt að vera hérna þrátt fyrir þessa miklu fáttækt og langaði að koma aftur eftir útskriftina," útskýrir Steinunn, en hún heimsótti landið fyrst fyrir tvemur árum síðan sem ferðalangur og segist strax hafa heillast af bjartsýni og góðvild heimamanna.

„Þessi þjóð er búin að ganga í gegnum algjört helvíti á síðustu áratugum en þrátt fyrir það er fólkið alltaf brosandi og alveg sérstaklega elskulegt."

Steinunn fékk starfið í Kambodíu eftir starfsviðtal sem fór fram í gegnum samskiptavefinn Skype og mun hún starfa við skólann næsta árið.

„Þetta er alþjóðlegur barnaskóli og nemendurnir koma meðal annars frá Frakklandi, Kína, Mongolíu, og Kambódíu. Ég er einskonar framkvæmdarstjóri skólans og er með litla skrifstofu þar sem ég sit og sé um daglegan rekstur skólans og að öll samskipti milli starfsfólksins og foreldranna séu góð," segir Steinunn en ásamt henni starfa tvær aðrar íslenskar konur við skólann og telur Steinunn líklegt að þær séu einu íslensku stúlkurnar í Phnom Penh borg.

Vinnudagurinn hefst snemma í Kambodíu og að sögn Steinunnar vaknar borgin til lífsins klukkan fimm á morgnanna og eru börnin mætt í skólann upp úr sjö. „Það getur verið erfitt að rífa sig á fætur en það er dásamlegt að mæta í vinnuna í hóp glaðlegra krakka," segir hún.

Aðspurð segist Steinunn hafa mikinn áhuga á að starfa áfram að þróunarverkefnum í Kambódíu og þá helst með börnum. „Ég hef mjög gaman af því að vinna með börnum og hef mikinn áhuga á að vinna frekar með börnum sem hafa ekki efni á að ganga í skóla eins og þann sem ég er að stýra núna. Hér er mikið af hjálparsamtökum sem vinna mjög þarft starf bæði í þágu barna og kvenna og það væri gaman að fá tækifæri til að vinna með þeim í framtíðinni," segir hún að lokum.

sara@frettabladid.is