Slær í gegn á Netinu eftir 40 ára brandarasöfnun

„Ég er með ofboðslegt brandara­minni,“ segir gleðigjafinn og yfirvélstjórinn Ragnar Rúnar Þorgeirsson.

Ragnar byrjaði að segja brandara á myndböndum á samskiptasíðunni Facebook í vikunni og vakti strax athygli. Brandararnir hafa gengið manna á milli á Netinu og vakið mikil viðbrögð. Svo mikil að Ragnar segist vera rasandi hissa. „Fólk segir að brandararnir séu snilld og aðrir biðja um meira,“ segir hann og hlær. „Einn sagði að ég væri staðgengill Spaugstofunnar.“

En hvernig byrjaði þetta?

„Ég var búinn að vera mana mig upp að segja brandara í vélina í nokkrar vikur,“ rifjar Ragnar upp. „Svo lét ég mig hafa það að prufa einn. Það vakti svo mikil viðbrögð að ég átti ekki til orð, svo kom ég með annan og er kominn með fimm brandara í dag. Ég held að sprengjan hafi orðið vegna þess að fyrsti brandarinn var svo góður. Það kom þessu öllu af stað.“

Ragnar hefur að eigin sögn alltaf verið mikill brandarakall og á fulla möppu af bröndurum. „Ég er búinn að safna í 35 eða 40 ár – og ekki bara í möppu, ég er líka með dós sem ég set alltaf brandaramiða í. Svo er ég með þetta í kollinum,“ segir hann. „Ég hef bæði skrifað niður og munað – ég man þá aðallega. Ég hef alla tíð verið þannig að ef ég man eftir brandara, þá segi ég hann á staðnum. Þegar á við.“

Ragnar býr í Grindavík og er yfirvélstjóri á Hans Jakobi GK 150. Hann rær frá Sandgerði og stundar sæbjúgnaveiðar. Hann játar að brandararnir séu vinsælir um borð.

„Þegar við erum að spjalla saman þá man ég oft eftir brandara og fleygi honum fram,“ segir Ragnar. „Það hefur fallið í góðan jarðveg.“

Ragnar ætlar að halda áfram að setja brandara á Netið, enda rignir yfir hann hrósi frá fólki um allt land.

„Ég fékk kveðju frá sjúkraflutningamönnum á Egilstöðum. Þeir báðu um meira og sögðu að ég hefði bjargað deginum,“ segir hann. „Ég er mest ánægður með það geta glatt einhvern. Í öllu þessu tali um kreppu er ljós í myrkrinu að koma með svona.“

Áhugasamir lesendur geta slegið nafn Ragnars inn í leit á Facebook og þá ætti síðan hans að birtast.

atlifannar@frettabladid.is