Ráðherra telur kaup Magma vera ólögleg

Steingrímur J. Sigfússon fjármálaráðherra telur að kaup Magma Energy á hlut Geysis Green Energy í HS orku stangist á við lög. „Ég tel að það orki mjög tvímælis að fjárfesting í gegnum skúffufyrirtæki í Svíþjóð sé í samræmi við lög," segir Steingrímur. „Ég er þeirrar skoðunar að þetta sé ekki í samræmi við anda laganna og er þá frekar sammála minnihluta nefndarinnar. En svona er staðan. Meirihluti nefndarinnar tók þessa afstöðu og við sitjum uppi með það í bili."

Steingrímur segir flokk sinn hafa þá stefnu að stór og mikilvæg orkufyrirtæki séu betur komin í eigu Íslendinga og vill nýta alla möguleika til þess að vinda ofan af málinu.

„Það leikur enginn vafi á því að lög eiga eftir að taka breytingum á þessu sviði á næstu misserum," segir hann. „Það þarf að þrengja lagarammann til muna varðandi ráðstöfun auðlinda, hámarkstíma samninga tengda þeim og skorður á eignarhaldinu."

Katrín Júlíusdóttir iðnaðarráðherra segir að miðað við það mat sem hún hefur séð sýnist henni að engin lög hafi verið brotin í kaupunum, en þau megi alltaf endurskoða.

„Við verðum að horfa til þess að eignarhluti er ekki að koma úr eigu hins opinbera í einkaeigu," segir hún. „Þetta er tugmilljarða skuldbinding sem er um að ræða og við erum að vinna að því að tryggja forkaupsrétt ríkisins á þessum hlut. Þegar betur árar getum við farið inn í þessi kaup ef Magma ákveður að selja."

Ásgeir Margeirsson, forstjóri Magma Energy Iceland ehf., segir að reiðubúið sé að ræða þann forkaupsrétt. „Þetta á auðvitað ekki við ef lög verða sett á samninginn. Ef ríkið ætlar að ræða við okkur um þessi mál þá er ekki líklegt að samningnum verði rift," segir Ásgeir.

Katrín telur leigutíma samnings Magma við Reykjanesbæ - 65 ár með möguleika á framlengingu um önnur 65 - á jarðhitaréttindum vera of langan og vert sé að endurskoða hann.

Ásgeir segir samningana hafa verið gerða við HS orku árið 2009, fyrir tíma Magma, og fyrirtækið hafi nú lýst því yfir að möguleiki sé að endurskoða samningstímann.

„Aðalatriðið er að fyrirkomulagið stuðli að skynsamlegri nýtingu. Mjög stuttur tími getur unnið gegn því og einnig leitt til hærra orkuverðs," segir Ásgeir. „En við erum mjög reiðubúnir til að ræða þessi mál við ríkið og sveitarfélögin." - sv