Alþjóðlegur dagur bókarinnar er í dag

Alþjóðlegur dagur bókarinnar er í dag, 23. apríl. Deginum var komið á fót af Unesco Alþjóðadegi bókarinnar var komið á fót af UNESCO og er helgaður bókum og höfundarrétti. Ástæðan fyrir valinu er að 23. apríl, messa heilags Georgs, hefur um langa hríð verið dagur bókarinnar í Katalóníu og bóksalar Barcelona jafnan gefið rós eða önnur blóm með hverri bók sem seld er þennan dag.

Þessi fallegi siður hefur breiðst út til fleiri landa í kjölfar þess að UNESCO tók daginn upp á arma sína og við þennan dag miðast mörg verkefni stofnunarinnar sem lúta að bókum, til dæmis útnefning Heimshöfuðborgar bókarinnar.

Í tilkynningu segir að dagurinn tengist einnig æviferli margra mikilvægra rithöfunda, er til að mynda dánardægur bæði þjóðskálds Spánverja, Cervantesar, og þjóðskálds Breta, Shakespeare. Þess má geta að Nóbelskáldið Halldór Laxnes fæddist 23. apríl auk þess sem höfundarnir Vladimir Nabokov og Manuel Mejía Vallejo eru fæddir á þessum degi.

Félag íslenskra bókaútgefenda stendur að Viku bókarinnar, sem hófst 21. apríl og stendur til 27. apríl. Ávísun á lestur hefur verið borin í hús. Þetta er í fimmta sinn sem heimili landsins fá senda 1.000 króna ávísun sem hægt er að nota sem greiðslumiðil þegar keyptar eru bækur sem kosta að minnsta kosti 3500 krónur.