The Charlies syngja fyrir útvalda

„Nú erum við bara á fullu að æfa nýju lögin og undirbúa okkur,“ segir Alma Guðmundsdóttir sem myndar stúlknasveitina The Charlies ásamt Klöru Elíasdóttur og Steinunni Kamillu. Stúlkurnar þrjár voru valdar af útgáfufyrirtæki sínu, Hollywood Records, til að taka þátt í miklu kynningarkvöldi fyrir nýja listamenn þar sem mættir verða allir helstu stórlaxarnir í bransanum ásamt auglýsendum. Viðburðurinn, sem nefnist LA Roadshow, er því eftirsóttur til að koma fram á fyrir upprennandi tónlistamenn. „Þetta er alveg frábært tækifæri fyrir okkur til að sýna hvað við getum,“ segir Alma og bætir við að þær séu líka mjög stoltar yfir að hafa verið valdar af plötufyrirtæki sínu til að koma fram en hvert útgáfufyrirtæki fær aðeins að senda einn fulltrúa. „Við verðum með 20 mínutna prógramm með öllum nýjustu lögunum okkar eða þeim sem við erum búnar að vera að æfa hér síðan við komum út. Svo ætlum við að gera órafmagnaða útgáfu af lagi sem ég samdi með strákunum í Stop Wait Go og heitir Game Over,“ segir Alma en það lag söng sveitin einmitt þegar þær fengu samningin við Hollywood Records. LA roadshow fer fram þann 13. september næstkomandi og er kvöldið eins konar kynning á því sem væntanlegt er innan skemmtanabransans á næstu tveimur árum. Útsendarar frá fyrirtækjum á borð við Universal Studios, Paramount, Sony Pictures, 20th Century Fox, Walt Disney og Play Station svo fátt eitt sé nefnt. Eins og Fréttablaðið greindi frá fyrir stuttu voru stúlkurnar að landa breiðskífusamningi hjá Hollywood Records og verður forvitnilegt að sjá hvernig bransinn í Hollywood tekur íslensku stúlkunum í The Charlies. - áp