Vekur athygli þýskra bloggara

Fjallað var um verslunina Glad I Never á þýsku netsjónvarpsstöðinni Berlinfashion.tv fyrir skemmstu, en verslunin er í eigu Íslendingsins Baldvins Dungal og var opnuð í desember síðastliðinn.

„Stúlkan sem sér um þennan tískuþátt gengur um borgina og finnur skemmtilegar búðir sem hún fær svo leyfi til að fjalla um. Glad I Never er ekki búin að vera það lengi til að maður afþakkar ekki ókeypis augýsingu þannig ég spjallaði við hana í tæpa klukkustund og sýndi henni búðina. Ég hef bara horft á myndbandið einu sinni því ég varð svo pirraður á öllum málfræðivillunum hjá mér," segir Baldvin og hlær. Hann rekur verslunina í samstarfi við móður sína, Elínu Kjartansdóttur, og Elsu Maríu Blöndal, söngkonu og fatahönnunarnema.

Aðspurður segist Baldvin hafa fengið hina ýmsu tískubloggara í heimsókn síðan verslunin var opnuð og segir slíka umfjöllun góða fyrir viðskiptin. „Það koma alltaf einhverjir viðskiptavinir að skoða sem segjast hafa lesið umfjöllun um verslunina á netinu, en það verður þó aldrei nein sprenging í kúnnafjölda eftir svona umfjöllun."

Að sögn Baldvins gengur rekstur verslunarinnar ágætlega og fjölgar viðskiptavinunum með hverjum mánuði. „Ætli það megi ekki segja að þetta sé rekið á sléttu en þetta batnar alltaf með hverjum mánuðinum, þannig það er góð ástæða til að vera bjartsýnn. Við reynum líka að vekja athygli á okkur með því að hafa skemmtilegar uppákomur í versluninni minnst einu sinni í mánuði og það hefur reynst vel." segir Baldvin. -sm

Hér má sjá umfjöllun berlinfashion.tv um Glad I Never.