Húðflúr stór mistök

Sjónvarpsstjarnan sem varð hönnuður, Nicole Richie, lét húðflúra orðið jómfrú eða „virgin" á úlnliðinn á sér þegar hún var sextán ára.

Nicole er með nokkur húðflúr á líkamanum sem hún er tiltölulega sátt við, nema þetta umrædda orð sem fer gríðarlega í taugarnar á henni.

„Ég er í meyjarmerkinu. Þegar ég var sextán ára lét ég húðflúra á úlnliðinn á mér orðið jómfrú því ég hélt það væri hipp og kúl á þeim tíma. Í dag er þetta mjög pínlegt og ég tala nú ekki um að þurfa sífellt að útskýra það fyrir öðrum," sagði Nicole.

Nicole, sem á tvö börn með Joel Madden, yfirbugaði fíknina með því að fara í meðferð og í dag leggur hún sig fram við að lifa hamingjusömu edrú lífi.

„Ég tek fulla ábyrgð á gjörðum mínum í fortíðinni hvort sem þær eru góðar eða slæmar. Ég skapaði þessar aðstæður sjálf. Þegar fólk spyr mig hvort líf mitt sé Hollywood að kenna eða foreldrum mínum svara ég alltaf að það var ég sem var við stjórn og með hjálp góðra manna náði ég að vinna mig út úr ruglinu."