Logi Geirsson stofnar fótboltalið

Logi Geirsson landsliðsmaður í handknattleik hefur stofnað nýtt stjörnulið í knattspyrnu. Hann hefur hóað í marga þekkta einstaklinga sem saman koma til með að mynda firna sterkt knattspyrnulið, sem að sögn Loga myndi vera í toppbaráttu í Pepsi-deildinni.

Meðal þeirra sem verða í liði Loga eru Egill Gillzenegger, Maggi Mix og sjónvarpskokkurinn Rikka en einnig verða gamlar kempur úr fótboltanum á borð við Viðar Halldórsson fyrrverandi landsliðsmann í knattspyrnu.

Fyrsti leikur þessa nýja stjörnuliðs verður á morgun, laugardag, kl. 15:00 á Kaplakrikavelli en þá mun liðið mæta úrvalsliði yngri flokka þjálfara FH.

Leikurinn verður liður í upphitun stuðningsmanna FH fyrir úrslitaleik VISA bikarsins í karlaflokki en þar eigast við FH og KR. Í framhaldi af leiknum fer síðan fram Fjölskylduhátíð FH í Kaplakrika þar sem dagskráin verður troðin af frábærum atriðum úr öllum áttum auk þess sem grillað verður ofan í gesti og sérstakt bikartilboð verður á pylsum, Svala og FH-bolum.

Dagskráin hefst kl. 15:00 og stendur til kl. 16:45 en þá fara fríar rútur úr Kaplakrika á Laugardalsvöll þar sem leikurinn fer fram.

Viðtal við Loga Geirsson, stofnanda Stjörnuliðs Loga Geirs, og Friðrik Dór Jónsson, söngvara og meðlim úrvalsliðs yngri flokka þjálfara FH, má sjá hér.