María Sigrún fréttakona: Ég var óþolandi

„Ég var orðin 23 ára þegar ég ákvað að leggja fréttamennskuna fyrir mig," sagði María Sigrún Hilmarsdóttir fréttakona þegar við spurðum hana hvenær hún tók ákvörðun að starfa við fjölmiðla.

„Þá hafði ég lokið BA gráðu í hagfræði og ákvað að skella mér í master í fréttamennsku. Hagfræðin var góður grunnur en mig langaði í eitthvað enn fjölbreyttara. Ég hef vítt áhugasvið og vildi vinna við eitthvað lifandi og skemmtilegt. Svo að fréttamennskan lá beint við og ég var svo heppin að fá tækifæri til að spreyta mig á fréttastofu RÚV þar sem ég hef verið síðan og líkar mjög vel," María Sigrún.

„Ég hef alltaf verið svo forvitin og þegar ég var litil var ég stöðugt að spyrja afhverju þetta og afhverju hitt og var víst á köflum óþolandi hvað þetta varðar. Svo að foreldrum mínum finnst mjög fyndið að í dag vinni ég við að spyrja og leita svara með grúski."

Kostir og gallar við starfið? „Kostirnir sem fylgja starfinu eru að mínu mati margfalt fleiri en gallarnir. Mér finnst þetta skemmtilegasta starf sem ég get hugsað mér," segir María Sigrún og heldur áfram:

„Maður hefur umboð til þess að spyrja hvern sem er um hvað sem er. Svo gefst manni líka kostur á því að hitta alls konar fólk við alls konar aðstæður á hinum og þessum stöðum og miðla upplýsingunum áfram. Svo er maður í hingiðunni og er oft á staðnum þar sem hlutirnir gerast og fær allar hliðar lífsins beint í æð. Þetta á vel við mig."

„Gallarnir eru kannski einna helst þeir að maður vinnur oft á kvöldin og um helgar þegar aðrir eiga frí og missir því af hinu og þessu hjá vinum og fjölskyldu. Svo getur stundum verið heilmikið stress í kring um þetta en mér tekst oftast að nýta það á jákvæðan hátt og hef lúmskt gaman af smá stressi og spennu."