Paris náði fram dómsátt

Paris Hilton mætti fyrir dómara í Las Vegas og játaði að hafa haft í fórum sínum nokkur grömm af kókaíni. Paris fékk skilorðsbundinn dóm í ár og var gert að sinna samfélagsskyldu. Samkvæmt Radar-Online.com hefur Paris þegar haft samband við lækninn sinn og óskað eftir að komast í samtalsmeðferð hjá honum.

Hótelerfinginn beið hins vegar ekki boðanna eftir að dómur var fallinn og rauk af stað í viðskiptaferð til Asíu. Þar hugðist hún opna smásöluverslun með fatnaði og smáhlutum. Ferðin hafði verið skipulögð í þaula undanfarið hálft ár og því var það Paris mikið kappsmál að geta komist í hana.

Samkvæmt AP-fréttastofunni í gær var Paris hins vegar stöðvuð af landamæravörðum í Japan og meinuð innkoma í landið og því óljóst hvað verður um þessa viðskiptaferð úr þessu.