Plantar fræjum í fjölda erlendra heimildarmynda

„Það eru forréttindi að fá að taka þátt í þessari miklu vakningarbylgju um stöðu upplýsingafrelsis,“ segir þingkonan Birgitta Jónsdóttir.

Hún kemur fram í nýrri heimildarmynd sem bandaríska kvikmyndagerðarkonan Judith Ehrlich er með í undirbúningi. Ehrlich er annar af leikstjórum heimildarmyndarinnar The Most Dangerous Man In America sem var tilnefnd til Óskarsverðlauna fyrr á árinu og verður sýnd á Riff-kvikmyndahátíðinni í Reykjavík.

Ehrlich er stödd hér á landi ásamt upptökuliði við gerð nýju myndarinnar, sem fjallar um Wikileaks-síðuna og verkefni Birgittu, Iceland Modern Media Initiative, þar sem lögð er áhersla á aukið upplýsingafrelsi. Birgitta fór með Ehrlich og félaga á áhorfendapalla Ráðhúss Reykjavíkur í gær þar sem mótmæli fóru fram. „Mig langaði að leyfa þeim að upplifa íslenskan mótmælakúltur,“ segir hún.

Hún er ánægð með þátttöku sína í heimildarmyndinni. „Þetta er bara mjög gaman og gefandi. Við vorum að tala um Immann (Immi.is) fyrst og fremst og Wikileaks og stöðu tjáningar og upplýsingafrelsisins bæði hér og í Bandaríkjunum. Hvað það á mikið undir högg að sækja og hvað þetta er mikilvægt. Við lítum svolítið á okkur eins og aðgerðarsinna og viljum að þeir verði algengari á meðal almennings.“

Birgitta er afar vinsæl á meðal erlendra kvikmyndagerðarmanna því hún kemur fram í fleiri heimildarmyndum sem eru í bígerð sem fjalla um upplýsingafrelsi. Ein þeirra kemur úr smiðju Kate Albright-Hanna sem stjórnaði hinum vel heppnuðu Viral-auglýsingum í kosningaherferð Baracks Obama. Mynd hennar mun fjalla um Birgittu og hefjast tökur í Frakklandi í næsta mánuði.

Birgitta mun sömuleiðis koma fram í stuttri heimildarmynd fyrir frönsku sjónvarpsstöðina Canal+ auk þess sem hún mun hitta sænskan kvikmyndagerðarmann í næstu viku. „Þetta er mjög súrrealískt. En ég lít á það sem gríðarleg forréttindi að fá að planta fræjum og setja þessi viðmið. Það er í raun ómetanlegt fyrir Íslendinga að fá svona góða umfjöllun í heimspressunni.“

freyr@frettabladid.is