Hjálmar verður Einar blaðamaður

„Ég reikna með Hjálmari í hlutverkið,“ segir Friðrik Þór Friðriksson kvikmyndaleikstjóri. Hann er að fara af stað með Tíma nornarinnar, fjögurra þátta sjónvarpsseríu sem byggir á samnefndri sögu Árna Þórarinssonar. Hjálmar, sem Friðrik minnist á, er Hjálmarsson, bæjarfulltrúi Næstbesta-flokksins í Kópavogi. Hjálmar hefur reyndar leikið þetta hlutverk áður, var Einar blaðamaður þegar Útvarpsleikhúsið flutti leikritið fyrir rúmu ári. Friðrik, sem var nýkominn af æfingu þegar Fréttablaðið náði tali af honum, reiknaði með að fara í tökur í lok þessa mánaðar eða byrjun þess næsta. „Þetta verður páskasprengjan á RÚV.“

Af þessum sökum getur Friðrik ekki mætt á fjölda kvikmynda­hátíða en kvikmynd hans, Mamma Gógó, er bókuð í slíkar veislur úti um allan heim, meðal annars í Sao Paulo og Pusan. Friðrik segir að það hafi gengið vel að selja myndina á kvikmyndahátíðinni í Toronto, hún sé komin með bæði bandarískan og evrópskan dreifingaraðila. „Og svo erum við að fara að keppa um gommu af peningum í Gautaborg, sautján milljónir, þegar besta kvikmynd Norðurlandanna verður valin,“ segir Friðrik. Mamma Gógó er síðan í hópi þeirra kvikmynda sem koma til greina í Óskarsforvalið.- fgg