Winona Ryder snýr aftur í sviðsljósið

Fyrsti áratugur nýrrar aldar lék bandarísku leikonuna Winonu Ryder grátt. Ferillinn fór niður í ræsið eftir að hún var dæmd fyrir búðaþjófnað í mars 2002 en fram að því var hún svo fræg og eftirsótt að fyrrverandi kærasti hennar, Johnny Depp, var með húðflúrað á öxlinni sinni „Winona forever".

En Winona virðist smám saman vera ná áttum aftur eftir að hafa þurft að sætta sig við aðalhlutverk í b-myndum sem litla athygli hafa fengið. Hún leikur stórt hlutverk í kvikmyndinni Black Swan eftir Darren Aronofsky og hefur fengið lofsamlega dóma fyrir en líklegt þykir að Natalie Portman hreppi jafnvel tilnefningu til Óskarsverðlauna fyrir leik sinn.

Tim Burton hefur síðan ráðið Winonu til að tala inn á sína nýjustu teiknimynd, Frankenweenie, en Ryder og Burton gerðu síðast saman hina stórkostlegu Edward Scissorhands ásamt áðurnefndum Depp.

Winona er um þessar mundir að leika á móti Channing Tatum, Vince Vaughn og Kevin James í kvikmyndinni The Dilemma eftir Ron Howard. Aðdáendur Ryder, sem eflaust eru fjölmargir, ættu því að geta farið að taka gleði sína á ný.