Ólafur F. skrifar ævisögu sína

„Það er siðferðisleg skylda mín að segja mína sögu. Hvort það verður á þessu ári eða því næsta, í bókaformi eða á einhvern annan hátt verður bara að koma í ljós. Ég á allavega mikið af heimildum í mínum fórum sem hafa ekki áður komið fram," segir Ólafur F. Magnússon, læknir og fráfarandi borgarfulltrúi.

Ólafur leiddi lista H-framboðs í borgarstjórnarkosningunum á laugardaginn en kom ekki manni að. Þar með lauk 19 ára setu hans í borgarstjórn. Ferill Ólafs hefur ekki alltaf verið dans á rósum og það hefur oft gustað um hann.

Ólafur viðurkennir að það eigi eflaust eftir að hrikta í einhverjum stoðum nú þegar ljóst er að hann ætli að miðla af reynslu sinni af pólitíkinni. Hann var um tíma borgarstjóri í Reykjavík, hann klauf sig frá Sjálfstæðisflokknum og Frjálslynda flokknum og því ljóst að af nægu er að taka. Einhverjir höfðu áhyggjur af því hvernig Ólafur myndi taka kosningaúrslitunum ef þau færu illa enda segist hann sjálfur vera viðkvæm og tilfinningarík persóna.

„Ég er eiginlega undrandi á því hversu rólegur ég er. En það er örugglega vegna þess að ég er meira en stoltur af því sem ég hef áorkað á mínum ferli og stend í dag eftir þessa reynslu svo miklu sterkari og heilsteyptari einstaklingur."

Ólafur segist ætla að nýta tíma sinn í að rækta samband sitt við fjölskyldu sína sem hafi mátt þola mikið álag, starf sitt sem læknir og njóta meiri samvista við landið sitt sem hann elski svo mikið. - fgg