Cruise varðveitir æskublómið

Leikarinn Tom Cruise hefur sett sér takmark sem hann hyggst ná á næstu mánuðum. Samkvæmt tímaritinu In Touch Weekly vill Cruise yngjast um tíu ár áður en tökur á kvikmyndinni Mission Impossible IV hefjast í lok ársins.

„Tom er kominn í stranga líkamsþjálfun og æfir nú í þrjá klukkutíma á dag og borðar aðeins mat sem inniheldur fáar hitaeiningar,“ var haft eftir heimildarmanni.

Samkvæmt heimildum blaðsins vildu framleiðendur myndarinnar fá yngri og ódýrari leikara í hlutverk Ethans Hunt en Cruise var ekki á þeim buxunum. „Hann tók á sig launalækkun og er núna staðráðinn í að koma sér í form og útilokar ekki að fara í bótox til að virka enn yngri,“ sagði heimildarmaðurinn.