Íslensk þjóðerniskennd í Kína

Dúóið Heima sem er búsett í Xiamen í Kína hefur sent frá sér myndband við lagið I Know You. Þar er þjóðerniskenndin í fyrirrúmi og yfirgangur Breta gagnvart Íslendingum vegna Icesave-málsins gagnrýndur.

„Við sátum við tölvuna og vorum að horfa á BBC-viðtalið við Ólaf Ragnar og sáum þá einnig sjónarmið breskra fjölmiðla. Inngangurinn að viðtalinu var svo ósanngjarn gagnvart fallega landinu okkar og öllu fólkinu sem hafði ekkert að gera með þetta Icesave-mál,“ segir Elín Jónína Ólafsdóttir úr Heima. Hún hefur búið í fjögur ár í Kína ásamt manni sínum Rúnari Sigurbjörnssyni, hinum helmingi dúósins. „Þetta vakti hjá okkur þvílíka þjóðerniskennd að við vorum næstum því eins og Ameríkanar allan þann dag. Eina leiðin til að tjá þær tilfinningar var að semja þetta lag sem við frumfluttum svo á tónleikum daginn eftir. Það var góð tilfinning.“

Aðspurð segir Elín að Kínverjar hafi góðan skilning á vanda Íslendinga. „Fréttir héðan af Íslandi bera allar þann keim að Kínverjum finnst að það sé verið að ráðast ansi hart að okkur varðandi Icesave og að það ætti að gefa okkur tíma til að átta okkur á stöðunni og leyfa okkur að finna sanngjarna leið til að borga þessar skuldir. Svo það má segja að það séu engir fordómar gagnvart Íslandi í Kína, einungis stuðningur,“ segir hún.

Lagið I Know You er tekið af plötunni The Long Road Home sem kom út í Kína síðasta haust. Platan hefur enn ekki verið gefin út á Íslandi. Hægt er að hlusta á plötuna og skoða nýja myndbandið á síðunni Heimaworld.com. -fb