Ítalir hóta tískuvöruverslun á Akureyri

Halldóri Magnússyni, eiganda tískuverslunarinnar Imperial á Akureyri, hefur verið hótað alvarlegum aðgerðum ef hann hættir ekki að nota nafn ítölsku verslanakeðjunnar Imperial innan tveggja daga.

Halldór telur að íslenska tískufyrirtækið NTC standi á bak við þessar aðgerðir.

„Ég tel þetta vera hreint og klárt samkeppnisbrot," segir hann. NTC hefur selt vörur frá Imperial undanfarin ár og ítalska fyrirtækið hefur nú fengið einkaleyfi á nafninu hér á landi.

Halldór íhugar að höfða skaðabótamál gegn NTC vegna málsins. „Ég er að leita réttar míns í því. Ég tel að þau séu að ná því að valda mér fjárhagslegum skaða og séu að ógna rekstri mínum verulega," segir hann.

Svava Johansen, forstjóri NTC, segir fyrirtækið síður en svo hafa verið í herferð gegn Halldóri og fyrirtæki hans. Hann hafi einfaldlega farið yfir strik sem sé ekki eðlilegt með því að nota nafn sem ítalskur framleiðandi eigi og hafi nú einkarétt á hér á landi.

„Þetta er fjölskyldufyrirtæki og þeir urðu mjög reiðir," segir Svava um viðbrögð Imperial. „Þeir eru alls ekki sáttir við að hann sé að opna verslun því þeir hafa hug á að opna verslun með okkur sem heitir Imperial," segir hún. - fb