Jógvan í samstarf við Hawks

Færeyski söngvarinn Jógvan Hansen er nýbúinn að gefa út nýtt lag en lítið hefur heyrst frá söngvaranum síðan í Eurovision. Lagið ber nafnið Save it for a rainy day og er skrifað af breska tónlistarmanninum Chesney Hawks.

„Það má eiginlega segja að lagið sé afleiðing af Eurovision,“ segir söngvarinn Jógvan Hansen glaður í bragði þegar Fréttablaðið náði af honum tali en hann er stoltur af nýja laginu sínu, Save it for a Rainy day.

„Þetta er lag um ástina eins og flest popplög en ég er mikill poppari í mér,“ segir Jógvan en það er enginn annar en tónlistarmaðurinn Chesney Hawks sem samdi lagið fyrir kappann.

„Ég var svo heppin að það voru margir mjög hrifnir af mér eftir Eurovision og Hawks var í svona lagasmiðabúðum í Hvalfirði síðasta vor og sá mig í keppninni,“ segir Jógvan en Hawks tók að senda honum lög frá hinum og þessum til að syngja og varð þetta lag fyrir valinu en það er útsett fyrir Jógvan af Vigni Snæ Vigfússyni. Hawks er vinsæll breskur poppari sem er hvað þekktastur fyrir lagið The one and only sem var í toppsætum bresku vinsældarslistanna árið 1991.

Jógvan útilokar ekki frekari þáttöku í Eurovision-keppninni en hann lenti í öðru sæti í vor. „Ég var eiginlega of nálægt því að vinna til að ég geti hætt. Ef rétta lagið kemur til mín er ég mjög mikið til í taka aftur þátt.“

Jógvan er þessa dagana að að einbeita sér að tónlistinni og er mikið búinn að vera að spila út um allt land í sumar. „Það tekur mikið á að vera tónlistamaður í fullu starfi og er ekki sérstaklega fjölskylduvænt. Ég er alltaf að vinna þegar allir hinir eru í fríi en ég elska þetta. Þetta er draumastarfið.“ Jógvan kemur fram í Hressingarskálanum í kvöld milli 20 og 23 og mun nýja lagið eflaust fá að hljóma þar. -áp