Gera heimildamynd um heitar laugar á Íslandi

Vinkonurnar Harpa Fönn Sigurjónsdóttir og Helga Sveinsdóttur ferðuðust um á puttanum í sumar og prófuðu heitu laugarnar sem landið hefur upp á að bjóða.

„Undirbúningur fyrir verkefnið hófst í kringum síðustu jól eftir að við rákumst á bókina Heitar laugar á Íslandi. Við höfum báðar ferðast mikið erlendis en hingað til hefur það farið forgörðum að ferðast um landið okkar, Ísland. Okkur langaði til þess að ferðast um landið á puttanum og ákváðum að slá tvær flugur í einu höggi og gerast puttaferðalangar og heimsækja flestar heitar laugar landsins í leiðinni," útskýrir Harpa Fönn Sigurjónsdóttir, sem lagði land undir fót ásamt vinkonu sinni, Helgu Sveinsdóttur.

Stúlkurnar höfðu kvikmyndavélar með í för og í haust hyggjast þær gefa út heimildarmynd sem fjallar um ferðir þeirra um landið. Harpa Fönn og Helga húkkuðu sér far alla leið austur á Seyðisfjörð þaðan sem þær héldu áfram upp á hálendi Íslands. Stúlkurnar heimsóttu meðal annars Kárahnjúka, Öskju, Mývatnssveit og Sprengisand og segir Harpa Fönn það hafa gengið misvel að fá far milli staða. „Það var alveg merkilega auðvelt að fá far við hringveginn en það var mun erfiðara á hálendinu, enda færri á ferð um það svæði. Það kom okkur í raun svolítið á óvart hvað Íslendingar voru duglegir að stoppa fyrir puttaferðalöngum." Harpa Fönn segir margar fallegar laugar leynast víða á landinu, en það kom þó fyrir að stúlkurnar yrðu fyrir vonbrigðum. „Við lentum tvisvar í því að koma að uppþornuðum laugum og aðrar voru einfaldlega of heitar til að baða sig í. Flestar voru þó afskaplega notalegar og Kaldbakslaug var eiginlega eins og stór tjörn þar sem við gátum tekið góðan sundsprett."

Innt eftir því hvaða laug henni hafi þótt fallegust svarar hún án þess að hika: „Laugin við Laugafell var án efa fallegust. Við náðum að plata hollenska parið sem hafði tekið okkur upp í til að koma með og þau sáu svo sannarlega ekki eftir því," segir Harpa glaðlega. Stúlkurnar héldu úti bloggi meðan á ferðalaginu stóð og hægt er að skoða það á síðunni www.heitarlaugar.blogspot.com.

sara@frettabladid.is