Winslet til Polanski

Kate Winslet hefur samþykkt að leika í nýjustu kvikmynd Romans Polanski, God of Carnage. Þrátt fyrir að myndin eigi að gerast í New York þá verður hún að mestu leyti tekin upp í París enda má Polanski ekki stíga fæti á bandaríska jörð án þess að eiga það á hættu að vera handtekinn.

Winslet hefur haft fremur hægt um sig síðan hún hlaut Óskarsverðlaun fyrir leik sinn í The Reader. Hún stofnaði sem kunnugt er samtök fyrir einhverfa ásamt Margréti Dagmar Ericsdóttur en hún varð fyrir miklum hughrifum af íslensku heimildarmyndinni Sólskinsdrengnum eftir Friðrik Þór. Winslet verður í góðum hópi í God of Carnage en meðal annarra leikara eru Jodie Foster og Christoph Waltz.