Fjölbreytt ástarlíf Cheryl

Breska söngkonan Cheryl Cole virðist hafa í nógu að snúast. Foreldrar tveggja karlmanna hafa nú lýst því yfir opinberlega að synir þeirra og hún eigi í eldheitu ástarsambandi.

Cheryl Cole fagnaði því nýverið að skilnaður hennar og knattspyrnukappans Ashley Cole væri gengin gegn en hann skilaði henni fjórum milljónum punda. Ashley var í breskum götublöðum orðaður við súludansmey sem þykir sláandi lík fyrrum eiginkonunni en það er þó ástarlíf Cheryl sem hefur stolið senunni. Fyrir ekki margt löngu var greint frá því að móðir rapparans, Will.I.Am væri himinlifandi með nýja kærustu sonarins, það væri hún Cheryl Cole. Mamman talaði frjálslega um það hversu hamingjusöm þau væru og hvað hana hlakkaði mikið til að hitta Cheryl yfir hádegismat í Los Angeles.

Nú virðist snuðra hlaupinn á þann þráð því Aaron Nelson, pabbi bandaríska dansarans Derek Hough, er alveg sannfærður um að sonur hans og Cheryl séu að rugla saman reitum ef marka má frétt í Sunday Telegraph. Cheryl og Derek hafa verið á ferðalagi saman ásamt hipp/hopp-hljómsveitinni Black Eyed Peas sem Will.I.Am er einmitt meðlimur í. Hlutirnir gætu því ekki verið flóknari.

„Í huga Derek er þetta sönn ást, á því leikur enginn vafi. Hann elskar hana útaf lífinu og það er ekki erfitt að falla fyrir Cheryl. Hún er einstök stúlka, ákaflega hæfileikarík og einstaklega falleg. Ég veit að Derek er ástfanginn af henni af því hann hefur sagt mér að svo sé og ég held að hún beri sömu tilfinningar til hans," sagði pabbinn.

Þetta er ekki í fyrsta skipti sem Cheryl og Derek eru sögð vera saman því skömmu eftir sambandsslit söngkonunnar og Ashley greindi News of the World frá því að Derek hefði gist hjá söngkonunni eina nótt. Ef að líkum lætur má búast við því að breska pressan grafi upp foreldra Cheryl og fái endanlega úr því skorið hvaða maður verði fyrir valinu hjá söngfuglinum.