Um 90 prósent nema munu ekki fá vinnu

Gífurleg aðsókn er í nám til flugumferðarstjóra á þessu ári. Tveir skólar þjálfa til starfsins, Keilir og Flugskóli Íslands. Umsækjendur um námið í Keili voru um 70 í ár, en einungis 30 verða teknir inn í bóknámið, sem varir í þrjá til fjóra mánuði og kostar 540 þúsund krónur.

Isavia, fyrrum Flugstoðir, óskuðu nýverið eftir nemum í flugumferðarstjórn til starfa og rennur umsóknarfrestur út 30. júlí. Bjarni Tryggvason, þjálfunarstjóri flugleiðsögusviðs, segist eiga von á 20 til 30 umsóknum.

„Það er mjög góð aðsókn í þetta,“ segir hann. „Nýliðunin í starfinu hefur verið nokkuð stöðug undanfarin ár sem er að vissu leyti afleiðing kreppunnar. Fólk er mikið að fara erlendis til að vinna sem kallar á endurnýjun í starfinu hér á landi.“

Árlega eru ráðnir milli fimm og sjö nýir flugumferðarstjórar á landinu sem þýðir að mikill meirihluti útskrifaðra nema mun vera án vinnu hér á landi.

„Isavia er eini möguleikinn hér á landi fyrir flugumferðarstjórn,“ segir Bjarni. „Þetta er hægt ferli. Það tekur um þrjú til fimm ár að verða fullgildur flugumferðarstjóri þó svo að námið í skólunum sé stutt.“

Heildarlaun flugumferðarstjóra hjá Isavia og Keflavíkurflugvelli eru ríflega 900 þúsund krónur á mánuði að meðaltali. Laun án yfirvinnu eða annarra aukagreiðslna hjá 59 ára gömlum flugumferðarstjóra eru rúmar 800 þúsund krónur. - sv