Hjaltalín styrkt til að kynna landið

„Við vildum sýna að hægt er að nota íslenska tónlist á markvissan hátt við að kynna land og þjóð," segir Steinþór Helgi Arnsteinsson umboðsmaður hljómsveitarinnar Hjaltalín.

Hjaltalín fékk styrk til að bjóða 14 erlendum blaðamönnum til landsins og sjá tónleika hljómsveitarinnar og Sinfóníu Íslands fyrr í þessum mánuði. Afraksturinn má svo lesa í greinum og dómum um tónleikana í mörgum af fremstu dagblöðum og tímaritum heims. Meðal annars kynnir blaðamaður danska dagblaðsins Politiken hljómsveitina sem bjargvætt íslenska orðsporsins og að þeir muni spila landið út úr kreppunni. Grein hans má lesa hér.

„Við bárum hugmyndina undir Útflutningsráð sem síðan hafði samband við Inspired By Iceland sem styrkti okkur í þessu verkefni," segir Steinþór. „Hljómsveitin er kynna plötuna Terminal í Evrópu og við töldum þetta vera góða leið til að koma okkur á framfæri; að leyfa fjölmiðlafólki að sjá Hjaltalín á heimavelli."

Steinþór bætir við að innflutningur blaðamannanna hafi verið hluti af þeirra eigin kynningarátaki. „Við lögðum líka pening í þetta á móti styrknum frá Inspired by Iceland. Okkur fannst við vera að slá tvær flugur í einu höggi. Kynna landið og hljómsveitina."

Anna Hildur Hildibrandsdóttir framkvæmdastjóri Útón, útflutningsráðs íslenskrar tónlistar segir að styrkur sem þessi sé ekki algengur. „Við töldum að í þessu verkefni færu saman hagsmunir beggja, sveitarinnar og kynningarátaksins," segir hún. „Það er ekki þannig að allar hljómsveitir geti sótt um styrki af þessu tagi. Hjaltalín fékk hann vegna þess að hljómsveitin er með útgáfuplan í Evrópu og fyrirhugað tónleikaferðalag." - áp