Hugleikur í flottum selskap

„Ég er á meðal einhverra 35 höfunda í bókinni. Það eru margir góðir þarna,“ segir Hugleikur Dagsson. Teikningar Hugleiks er að finna í ritsafni sem kvikmyndaframleiðandinn Judd Apatow hefur tekið saman og gefið út í bókinni I Found This Funny. Hugleikur er þar á meðal snillinga á borð við Steve Martin, Jon Stewart, Adam Sandler og Ernest Hemingway sem eiga efni í bókinni – hvort sem það er fyndið eða ekki.

Apatow er gríðarlega farsæll framleiðandi og leikstjóri, en eftir hann liggja myndir á borð við Knocked Up, 40 Year Old Virgin og Superbad. „Hann sendi mér allt í einu póst,“ segir Hugleikur. „Hann hafði víst verið búinn að reyna að ná í mig á Myspace, en ég nota það ekki lengur. Það var mjög fyndið þegar ég fór á Myspace um daginn og fann gömul skilaboð frá honum: „Þetta er Judd Apatow“ svo sagði hann: „Í alvöru, þetta er sko Judd Apatow.“ Hann var að fá leyfi til að nota brandara sem ég hafði teiknað til að setja í ritsafnið sitt. Ég sagði náttúrulega já, enda er ég mikill aðdáandi Apatow.“

Ágóði bókarinnar rennur til góðgerðarmála, þannig að það liggur í hlutarins eðli að Hugleikur fékk ekki greitt fyrir verk sín í bókinni. Sjálfur bíður Hugleikur eftir sínu eintaki, en forlagið McSweeney‘s hafði nýlega samband og sagði það vera á leiðinni. - afb