Svekktur Pálmi fær ekki hreindýr

„Auðvitað eru þetta vonbrigði ef maður sækir um ár eftir ár og er svona óheppinn. En það er ekkert við því að gera. Sumir eru bara heppnari en aðrir,“ segir leikarinn Pálmi Gestsson.

Á hverjum vetri er dregið um það hverjir fái að stunda hreindýraveiðar og hefur Pálmi ekki verið dreginn út síðastliðin þrjú ár. Spurður telur hann þó ekki að um klíkustarfssemi sé að ræða. „Ég held þetta séu bara himintunglin. Þetta er dregið út af handahófi í tölvu.“

Mörg hundruð manns sækja um að komast á hreindýraveiðar á sumrin en aðeins brot af þeim kemst í gegnum nálaraugað. Í nokkur ár hefur Pálmi ekki verið dreginn út en hefur engu að síður nokkrum sinnum komist inn af biðlista. Vonar hann að það endurtaki sig í ár.

Veiðitímabilið hefst 15. júlí og fær hver veiðimaður að skjóta eitt hreindýr. Pálmi hefur mjög gaman af þessu sporti þó svo að aflífun dýrsins sé ekki skemmtileg. „En þetta er frábær matur og síðan er það allt umstangið í kringum þetta.

Náttúran og þetta flandur upp um fjöll og firnindi. Að komast í samband við almættið og eilífðina er eftirsóknarvert,“ segir hann. - fb