„Þetta er í vinnuferli“

Ráðherrar ríkisstjórnarflokkanna tókust á um fækkun ráðuneyta á fimm klukkustunda löngum fundi í gærkvöldi. Fækkunin er hitamál en engin ákvörðun var tekin á fundinum þrátt fyrir hreinskiptar umræður.

Stjórnarsáttmálinn segir að fækka eigi ráðuneytum í áföngum úr tólf í níu og er stærsta breytingin sú að sameina landbúnaðar-, iðnaðar- og sjávarútvegsmál í eitt atvinnuvegaráðuneyti. Andstaða er við það meðal Vinstri grænna en umræður um fækkun ráðuneyta mun hafa tekið drjúgan hluta af þessum langa kvöldfundi í gær og var það í fyrsta skipti sem málið var formlega rætt á vettvangi ríkisstjórnar.

Samkvæmt heimildum fréttastofu úr röðum Vinstri grænna, er litið svo á að með því yrði ímynd landbúnaðar- og sjávarútvegs veikt innan stjórnsýslunnar og að sameiningin sé í raun liður í umsóknarferli að Evrópusambandinu. Úr herbúðum Samfylkingar heyrist hins vegar að Vinstri grænir sé einfaldlega að verja sína ráðherrastóla. Í dag eru tólf ráðuneyti til skiptanna, og jöfn skipting milli stjórnarflokka. Verði þeim fækkað í níu, verður skiptingin ójöfn nema þá að menn haldi einum utanþingsráðherra.

Engin endanleg ákvörðun mun hafa verið tekin um fækkun ráðuneyta á fundinum í gærkvöldi en Samfylkingin þrýstir á og hefur gert síðan Jóhanna Sigurðardóttir, forsætisráðherra, hélt kattarræðuna fyrir röskum mánuði. Þar boðaði hún fækkun ríkisstofnana og telja menn úr Samfylkingu að fyrst þurfi að sameina ráðuneyti áður en undirstofnanir verði sameinaðar.

Steingrímur J. Sigfússon, fjármálaráðherra, hafði þetta að segja um málið fyrir fundinn í gærkvöldi. „Þetta er í vinnuferli og það eru allir tilbúnir að skoða það málefnalega."

Fjárlög voru einnig rædd á fundinum og mun frekari niðurskurður á útgjöldum ríkisins þykja vænlegri kostur, en aukin skattheimta, til að rétta hag ríkissjóðs. Áætlað er að mesti niðurskurðurinn í þessari lotu verði á næsta ári.

„Þar erum við að tala um tugi milljarða. Menn höfðu nefnt töluna 50 milljarða samtals í aðgerðir á næsta ári en innan skamms kemur nánari fínstelling á það hvar við nákvæmlega endum," sagði Steingrímur.