Erfiða tímabilið hjá Jóni Gnarr: ógnaði Frímanni með haglabyssu

„Þátturinn með Jóni er tekinn upp í janúar 2009, löngu áður en hugmyndin að Besta flokknum er farin að gera vart við sig. Jón hefur sjálfur sagt að þetta hafi verið mjög erfiður tími í hans lífi og þetta er eiginlega týndi mánuðurinn hans Jóns," segir Gunnar Hansson leikari.

Á sunnudaginn frumsýnir Stöð 2 nýja sjónvarpsþáttaröð Gunnars um Frímann Gunnarsson sem ber hið skemmtilega heiti Mér er gamanmál. Þar ræðir Gunnar við fremstu skemmtikrafta Norðurlandanna og Bretlands en þeirra þekktastur er vafalítið Frank Hvam, stjarnan úr Klovn.

Eins og Fréttablaðið hefur greint frá verður slegið upp mikilli grínveislu í Háskólabíói hinn 29. september en þar mun Hvam ásamt Dagfinn Lyngbjö, André Wickström og Jóni Gnarr troða upp auk Frímanns sem verður í hlutverki gestgjafans.

„Reyndar ætlar hann að taka brjálað ábreiðulag með hljómsveit Birgis Ísleifs Gunnarssonar," segir Gunnar og bætir því við að gestir Háskólabíós megi eiga von á minnst tveimur leynigestum. „Annar þeirra verður besti uppistandari Íslands en ég get ekki greint frá því hver það er. Hinn á eftir að koma mjög mikið á óvart." - fgg