Hanna innbú hótels á eyjunni Fogo

Fatahönnuðurinn Guðbjörg Jakobsdóttir hefur dvalið á eyjunni Fogo við Nýfundnaland þar sem hún vinnur að því að skapa grunn að innbúi hótels sem rísa á á eyjunni.

Aðstandendur verkefnisins fengu til sín sextán hönnuði, listamenn og handverksfólk víða að úr heiminum til að taka þátt í verkefninu. Ástæðan að baki þess er meðal annars sú að halda á uppi atvinnu á eyjunni og því munu heimamenn taka fullan þátt í allri undirbúningsvinnunni. Eyjan Fogo er við strönd Nýfundnalands og voru íbúar eyjunnar um 2.700 manns árið 2006.

„Þetta er tilraunaverkefni þar sem á að hanna nútímalegt hótel á þessari eyju sem úti á hjara veraldar. Samtökin sem standa að þessu verkefni eru góðgerðarsamtök sem eru að reyna að kveikja líf á eyjunni með því að búa til stað fyrir listafólk til að vinna á og kynna Fogo sem áhugaverðan áfangastað fyrir ferðamenn,“ segir Guðbjörg.

„Þátttakendur skipta á milli sín verkum eftir áhugasviði og menntun og stefnt er að því að hafa sem mesta samvinnu milli þátttakenda og heimamanna. Einnig er stefnt að því að allt hráefni komi sem mest frá eyjunni og að eyjarskeggjar geti framleitt innanstokksmunina að mestu sjálfir.“

Guðbjörg er ein fjögurra Íslendinga sem taka þátt í verkefninu, en með henni eru Dagur Óskarsson, Hafsteinn Júlíusson og Páll Einarsson. Verkefnavinnunni lýkur um mánaðamótin og er þá vonast til gunnhugmyndir að útliti hótelsins verði tilbúnar. - sm