Phil Spector gerir plötu

Playboy-módelið Rachelle Short, eiginkona Phils Spector, segir að þau hjónin ætli að gefa út plötu saman í júní. Platan var tekin upp áður en Phil fór í steininn, gefið að sök að hafa myrt leikkonuna Lönu Clarkson. Morðið átti sér stað árið 2003 en Rachelle og Phil giftust þremur árum síðar.

Lítið hefur verið gefið uppi um músíkina á plötunni, nema að Rachelle syngi á henni og Phil geri flest annað. Ef platan kemur út má telja líklegt að hún verði það síðasta sem hinn vankaði snillingur Phil Spector gerir á lífsleiðinni. Hann var dæmdur í 19 ára fangelsi fyrir morðið og verður orðinn 88 ára þegar hann á fyrst möguleika á náðun.