Lífið finnst

Sviðslistahópurinn Kviss búmm bang er skipaður þremur konum sem eru allar með menntun í gjörninga/leiklistarfræðum, myndlist og kynjafræði. Í verkum þeirra mætast því ólík sjónarmið, aðferðir og efnistök. Kvisskonur skapa heima sem eru bein framlenging á vestrænum menningarheimi samtímans og láta þátttakendur takast á við viðfangsefni sem viðkoma neyslumenningu, kynjafræði og lífsháttum í samtíma samfélagi.

Um þessar mundir sýna þær verkið GET A LIFE! sem var styrkt af Prologus og Reykjavíkurborg. Það er í formi sex vikna átaksnámskeiðs þar sem fólk tekur þátt og fær um leið nokkurs konar instant „allt innifalið“-pakka að nýju lífi. Í kvöld verður farið í félagslegu hliðina og fólki verður kennt að vinna með „small talk“ og mynda sér tengslanet, „network-a“ og spjalla við mikilvægt fólk. Námskeiðið það kvöld endar á því að umbreytast í opnun myndlistarsýningar. Samfundir þessir verða kl. 18.30 í sal á annarri hæð í Restaurant Reykjavík (gamla Kaffi Reykjavík). Allir eru velkomnir.

- pbb