Frá San Francisco

Helgi Tómasson komst í fréttir vestanhafs í liðinni viku þegar tilkynnt var að höfuðstöðvar San Francisco-ballettsins sem hann hefur stýrt í aldarfjórðung væru nefndar upp á nýtt. Þær bera héðan í frá nafn Cris Hellman, en hún hefur um langt árabil verið dyggur stuðningsmaður dansflokksins, setið þar í stjórn og ber, með þekkingu sinni, fjárstyrk og metnaði fyrir hönd flokksins, stóra ábyrgð á að flokkurinn er nú um stundir talinn besti listdansflokkur heims, segir í frétt San Francisco Chronicle í liðinni viku.

Helgi segir í viðtali að framlag Cris og eiginmanns hennar, auðkýfingsins Warren Hellman, hafi í 25 ár, gert sér kleift að gera San Francisco að besta dansflokki heims. Færir hann Cris miklar þakkir fyrir stuðninginn, bæði við flokkinn og sig persónulega. San Francisco-ballettinn er einn elsti starfandi dansflokkur heims og hefur starfað óslitið í 77 ár. - - pbb