Sonur Ingvars og Eddu syngur slagara Baggalúts

„Ég ætla að syngja Sofðu hjá mér sem Baggalútur gerði. Þetta er lag sem hefur allt, flottan texta með góðri sögu og flotta laglínu," segir Áslákur Ingvarsson, sem er fulltrúi MH í Söngkeppni framhaldsskólanna. Keppnin, sem er sú tuttugasta í röðinni, verður haldin á Akureyri eins og undanfarin ár en hún hefur alið af sér margar af fremstu poppstjörnum Íslands á borð við Pál Óskar og Emilíönu Torrini.

Áslákur er hins vegar þekktastur fyrir leik sinn í kvikmyndinni Kaldaljós eftir Hilmar Oddsson en hann var einmitt tilnefndur til Eddu-verðlaunanna árið 2004 fyrir frammistöðu sína í þeirri mynd. Hann varð þó að horfa á eftir styttunni góðu í hendurnar á föður sínum, Ingvari E. Sigurðssyni, en þeir feðgar léku einmitt aðalhlutverkin í myndinni. Hann hefur einnig leikið á fjölum Þjóðleikhússins og brá fyrir í Fornbókabúðinni, gamanþáttaröð sem sýnd var á Stöð 2. Þá er ótalið eitt Áramótaskaup.

Áslákur segist þó ekki vita hvort hugurinn stefni í leiklistina þótt genin séu vissulega til staðar í bæði karl-og kvenlegg því móðir Ásláks er Edda Arnljótsdóttir leikkona. „Nei, eins og er breytast hugmyndir mínar um framtíðina daglega. Ég fór ekki í inntökuprófið fyrir leiklistardeild Listaháskólans og veit ekkert hvort ég ætli að verða eðlisfræðingur, verkfræðingur, tónsmiður eða tónlistarstjóri," segir Áslákur sem auk námsins í Menntaskólanum við Hamrahlíð leggur stund á klassískt gítarnám hjá Páli Eyjólfssyni í Tónlistarskóla Reykjavíkur. Áslákur segist raunar vera eina barnið á heimilinu sem er að læra tónlist um þessar mundir, hinir bræður hans hafi orðið íþróttum að bráð. „En ég vona að þeir vitk­ist og snúi aftur í tónlistina," segir Áslákur og hlær.

Áslákur segir að hlustað sé mikið á tónlist á heimilinu. Og þá sérstaklega pabbi hans sem sé mikill grúskari þegar tónlist er annars vegar. „Hann á mjög gott safn af tónlist og maður fær alltaf iPodinn troðfullan af alls kyns lögum, popptónlist frá Tyrklandi, slagverkstónlist og svona mætti lengi telja. Við hlustum yfirleitt bara á þá tónlist sem okkur þykir góð, það skiptir minna máli hvaðan hún kemur."

freyrgigja@frettabladid.is