Ormur er rómantíska hliðin á Góa

„Ormur Óðinsson er rómantíska hliðin á mér,“ segir Gói, eða Guðjón Karl Davíðsson, sem leikur hinn 17 ára Orm í sýningunni Gauragangur sem verður sett á fjalirnar í Borgarleikhúsinu 19. mars.

Gói, eða Ormur réttara sagt, gerði sér lítið fyrir og gaf öllum stelpunum sem leika í Gauragangi rósir og konfekt í tilefni af Valentínusardeginum sem er á morgun. „Mér fannst alveg tilvalið að vera smá rómó,“ segir hann. Uppátækið féll vel í kramið, eins og kannski gefur að skilja. „Þær voru nú sjúkar í mig fyrir en þetta var eiginlega hálf vandræðalegt, þær voru svo ánægðar með þetta.“

Gói segir að æfingarnar fyrir Gauragang hafi gengið mjög vel. „Við erum farin að æfa á stóra sviðinu í leikmynd. Þetta er rosalega skemmtilegt leikrit eftir Ólaf Hauk og tónlistin eftir Nýdönsk er frábær. Þetta er líka geggjaður hópur sem ég er að vinna með.“

Rúmri viku eftir frumsýningu Gauragangs stígur Gói á svið í Laugardalshöllinni á Latabæjarhátíðinni, 27. mars. Þar verður hann í hlutverki Glanna glæps, sem hann hefur leikið nokkrum sinnum áður. „Ég hef verið í Latabæjarhlaupunum tvisvar sinnum. Reyndar gifti ég mig þegar Latabæjarhlaupið var í fyrra. Það var frekar óheppileg tímasetning því ég gat ekki verið Glanni þá,“ segir Gói og bætir við: „Þetta verður voða gaman og það er heiður að fá að fara í fötin hans Stefáns Karls. Það er gaman að það verði haldið svona stórt dæmi fyrir börn, svona stórtónleikar þar sem allir vinir barnanna eru samankomnir á einum stað. Þarna verður flott hljóðkerfi og þetta verður flott sýning. Það gerist ekki betra.“ -fb