„Ætli við þurfum ekki að drepast til að hætta“

„Ætli við þurfum ekki að drepast til að hætta,“ segja Spaugstofumenn. Þjóðin getur tekið gleði sína á ný því í dag var gengið frá því að gömlu, góðu heimilisvinirnir Ragnar Reykás, Kristján „heiti ég" Ólafsson og Geir og Grani verði áfram í sjónvarpi, en nú á Stöð 2.

Fylgst var með þeim á nýjan vinnustað í Íslandi í dag. Hægt er að horfa á þáttinn hér.

Verða í gamla Sjónvarpshúsinu

Laugardaginn 9. október næstkomandi mun Stöð 2 hefja sýningar á nýrri þáttaröð með Spaugstofunni á gamla sýningartímanum, klukkan 19.35, í læstri dagskrá. Spaugstofumennirnir Karl Ágúst Úlfsson, Pálmi Gestsson, Sigurður Sigurjónsson og Örn Árnason munu eftir sem áður vera allt í öllu í þessum vinsælu þáttum og undirrituðu samning þess efnis ásamt Ara Edwald forstjóra 365 miðla á blaðamannafundi sem fram fór í Þjóðmenningarhúsinu í dag. Samningurinn er til tveggja ára og tryggir að Spaugstofan verði á dagskrá Stöðvar 2 a.m.k. næstu tvo veturna.

Það er Saga film sem mun framleiða þættina, en fyrirtækið er til húsa í gamla Sjónvarpshúsinu við Laugaveg 176, þar sem Spaustofan hóf sína göngu. Karl segir helstu karakterana hafa orðið til þar.