Hvergerðingar læra að ala upp börn

Hveragerðisbær reynir að samræma uppeldisaðferðir íbúa með sérstöku námskeiði fyrir foreldra. Forseti bæjarstjórnar segir ekki óeðlilegt að bæjarfélagið hlutist til um barnauppeldi. Þetta sé skemmtileg þjónusta við bæjarbúa.

Bæjarfélagið Hveragerði hefur frá árinu 2007 boðið foreldrum átta klukkustunda námskeið um barnauppeldi þeim að kostnaðarlausu, en þeir foreldrar sem sækja það fá fimm prósenta afslátt af leikskólagjöldum hjá bænum. Námskeiðið ber heitið Agi uppeldi og hegðun: Færni til framtíðar.

„Þetta gengur út á að samræma uppeldisaðferðir foreldra og þeirra sem starfa á leikskólunum, svo hægt sé að beita sömu uppeldisaðferðum. Þetta byggir á virkri hlustun, jákvæðri gagnrýni og jákvæðum aga," segir Unnur Þormóðsdóttir, forseti bæjarstjórnar Hveragerðis.

Unnur segir bæði hjúkrunarfræðinga, félagsmálastjóra og leikskólakennara úr bænum sjá um námskeiðið. Alls hafi átta til tíu námskeið verið haldin, og það næsta verði í haust. En er eðlilegt að bæjarfélagið sé að hlutast til um uppeldi íbúa með þessum hætti?

„Þetta hefur verið á höndum heilsugæslustöðva og þar hafa foreldrar þurft að greiða fyrir þetta sjálfir. Við ákváðum að þetta væri bætt og skemmtileg þjónusta við bæjarbúa. Það getur hver ráðið hvort hann sækir námskeiðið," segir Unnur. En hefur bæjarfélagið ekki búið foreldrum mjög skýra fjárhagslega hvata til að sækja námskeiðið með afslættinum á leikskólagjöldum?

„Í raun og veru. Þeir fá bæði afslátt og svo að reyna að samræma uppeldisaðferðirnar. Það er best fyrir barnið."

Spurð hvort hætta sé á að allir séu steyptir í sama mót þegar uppeldi allra heimila sé samræmt með þessum hætti segir Unnur:

„Það er náttúrulega engir persónuleikar eins, svo þú getur aldrei steypt alla í sama mót," segir Unnur, sem telur að námskeiðið hafi gefist afar vel.