Carrey borðaði ekki neitt

Jim Carrey var úrvinda eftir að hafa þurft að léttast um mörg kíló fyrir leik sinn í myndinni I Love You Phillip Morris. Í einu atriði myndarinnar liggur hann í fangelsisrúmi þar sem greinilega sést í rifbeinin á honum.

„Síðustu vikuna fyrir myndina drakk ég dálítinn tómatsafa af og til og fékk mér smá vatn til að halda mér á lífi," sagði Carrey.

„Síðustu tvo dagana fyrir aðaltökurnar var ég orðinn mjög grannur. Ég hætti algjörlega að borða og fékk mér bara smá sopa af vatni, eins og afrískur hlaupari." Í myndinni leikur Carrey svikahrapp sem flýr margoft úr fangelsi til að geta hitt samkynhneigðan elskhuga sinn.

„Ég var algjörlega búinn á því. Mér leið eins og gömlum manni síðustu tvo dagana og var algjörlega orkulaus. Þetta var algjör sadismi," sagði hann.