Gekk beint í flasið á lögreglunni

Ameríski söngvarinn D'Angelo var handtekinn aðfaranótt sunnudagsins á Manhattan. Hann er sakaður um að hafa ætlað að kaupa sér munngælur.

D'Angelo naut töluverðrar hylli á tíunda áratug síðustu aldar fyrir R&B tónlist sína. Hann gaf út tvo ákaflega vinsæla hljómdiska en hann gaf síðast út vinsælan disk árið 2000.

Síðan hefur lítið spurst til D'Angelo fyrr en um helgina að hann var handtekinn í Greenwich Village á Manhattan þegar að hann falaðist eftir munngælum gegn greiðslu. Illu heilli fyrir D'Angelo, sem heitir réttu nafni Michael Archer, var hin meinta vændiskona ekki öll þar sem hún var séð. Um var að ræða lögreglukonu sem hafði dulbúið sig sem vændiskonu.

Kaup á vændi eru ólögleg í New York fylki í Bandaríkjunum.