Ráðleggur mönnum að þefa ekki af nærbuxum

„Nýjasta meistaraverkið heitir Lífsleikni Gillz og er þriðja bókin í ritröðinni minni sem heitir Íslenzk Öndvegisrit Gillz," svarar Egill Einarsson rithöfundur spurður út í nýju bókina hans Lífsleikni.

„Tilgangur öndvegisritanna hefur alltaf verið að fjölga herramönnunum og fækka rasshausunum. Lífsleikni Gillz tekur upp þráðinn þar sem frá var horfið í Mannasiðabókinni."

„Það má segja að tilgangur bókarinnar sé að fjölga gleðistundunum í lífi manna," bætir hann við.

Hvers konar ráð erum við að tala um? „Bókin er stútfull af fyndnum og góðum ráðum, allt frá því hvernig menn eiga að kaupa blóm og til hvernig menn eiga að kaupa undirföt handa prinsessu," svarar Egill og heldur áfram:

„Í þeim kafla stendur meðal annars: „Menn verða að vita hvaða stærð prinsessan notar, það er algjört lykilatriði. Þá er tvennt í stöðunni, að sms-a vinkonu hennar og spyrja hvaða stærð hún noti eða lauma þér í nærbuxurnar hennar þegar hún sér ekki til og gá að stærðinni. Ekki haga þér samt eins og pervert og fara að þefa af nærbuxunum í leiðinni. Ef hún gómar þig með nærbuxurnar hennar í andlitinu á þér mun hún skottast út og þú ert ekki að fara að heyra í henni aftur". Þetta eru margir karlmenn bara ekki með á hreinu og því ómetanleg ráðlegging frá þeim Þykka."

Þú seldir gríðarlegt magn af Mannasiðabókinni í fyrra. Hvað erum við að tala um í ár - 15000 þúsund eintök? „Mannasiðabókin kláraðist fyrir jól í fyrra og mun færri fengu bók en vildu. Það fannst mér ömurlegt en svona er þetta bara. Prentvélarnar eru bara ekki hraðvirkari. Það er klárt að Lífsleikni Gillz mun seljast upp og einungis tímaspursmál. Ég er í þessu til að gleðja og vona að allir þeir sem vilji bók fái hana undir tréð í ár."

Eitthvað að lokum? „Lífið er of stutt fyrir eintóm leiðindi. Reynið að fjölga gleðistundunum og njóta lífsins! Þetta er skipun frá þeim Þykka," segir Egill áður en kvatt er.

Gillz.is - þar má meðal annars sjá Egil beran að ofan á rúmstokknum með Sigríði Klingenberg.