Robert Pattison leikur Kurt Cobain í stórmynd

Hjartaknúsarinn Robert Pattison er funheitur þessa dagana, enda hefur Twilight-vampíran hans væmna slegið í gegn hjá konum út um allan heim.

Nú gæti hann aftur á móti verið búinn að landa enn stærra hlutverki. Kurt Cobain í ævisögulegri mynd undir stjórn David Fincher, eins færasta leikstjóra samtímans.

Pattison er kominn á fullt í undirbúning og hefur nú þegar sett sig í gott samband við ekkju Kurt Cobain, ólíkindatólinu Courtney Love. Hún hjálpar til við undirbúninginn og hafði puttana í valinu á aðalleikurunum, leikstjóranum, handritsskrifum og tónlistarvali.

Pattison var efstur á listanum hjá Courtney til að leika Kurt og sjálf segist hún vera á góðri leið með að sannfæra Scarlett Johansson um að leika sig. Scarlett er víst vinkona dóttur hennar og Kurt, sem heitir Frances Bean Cobain og er 17 ára.

Kurt Cobain sló í gegn með hljómsveitinni Nirvana í byrjun tíunda áratugarins. Hann giftist Courtney Love árið 1992. Hann átti við eiturlyfjavandamál og þunglyndi að stríða og framdi sjálfsmorð árið 1994.

Kvikmyndin hefur hlotið nafnið All Apologies.