Ber brjóst og svínarifjahlaðborð

Joslyn James, ein af fjölmörgum hjákonum siðlausa framhjáhaldarans Tigers Woods, hefur ákveðið að endurvekja feril sinn sem fatafella.

Strippklúbburinn The Pink Pony í Atlanta í Bandaríkjunum hefur tryggt sér starfskrafta hennar um helgina og mun hún vafalaust sveifla sér tignarlega í kringum súluna frægu. Tiger Woods verður ekki langt undan því Masters-mótið í golfi fer nú fram á Agusta-vellinum í Georgíuríki.

Gestir staðarins fara ekki svangir út því fyrir aðeins 7 dollara og 75 sent býður staðurinn upp á hlaðborð. Þar verður meðal annars í boði svínarif, grænmeti, kartöflur og hrísgrjón.

Joslyn James segist hafa átt í margra ára ástarsambandi við Tiger Woods. Hún hefur unnið fyrir sér sem klámmyndaleikkona og meðal annars komið fram í myndunum Big Breasted Nurses, M.I.L.F. Internal 7 og Top Heavy 4.