Hársbreidd frá því að vera andlit Icesave í Hollandi

„Ég vissi ekki hvort ég var að fara að auglýsa íspinna eða bankareikninga,“ segir leikarinn Erling Jóhannesson.

Erling var valinn úr stórum hópi íslenskra leikara til að leika í auglýsingu fyrir Icesave-reikninga Landsbankans í Hollandi. Eins og fram hefur komið í Fréttablaðinu fóru prufurnar fram í maí árið 2008, aðeins nokkrum mánuðum fyrir bankahrun. Felix Bergsson var einn af þeim sem komu til greina í upphafi ásamt Hjálmari Hjálmarssyni og fjölmörgum öðrum leikurum.

Segja má að Erling hafi sloppið fyrir horn því auglýsingin var aldrei framleidd.

„Ég var hársbreidd frá því að vera andlit Icesave í Amsterdam,“ segir hann og dæsir. Icesave-málið hefur hangið yfir Íslendingum frá því að bankarnir hrundu og virðist engan endi ætla að taka. Kosið verður um samning tvö á laugardaginn og samninganefnd hefur verið í London síðustu daga í viðræðum við Breta og Hollendinga.

Handrit auglýsingarinnar fjallaði um listamann sem var að höggva einhvers konar ísskúlptúr. Svo var þeim skilaboðum komið á framfæri að vextir Icesave-reikninganna væru betri en gengur og gerist vegna þess að Íslendingar væru svo klárir. Loks átti Gunnar Þórðarson, eða einhver annar íslenskur tónlistarmaður, að vera frosinn inni í ísklumpinum. Erling segir íslenskan rembing af mjög sérstakri sort hafa verið einkennandi.

„Það var verið að segja við værum svo ísköld og skapandi – traust og klár,“ segir hann.

„En umfram allt svo hipp og kúl. Þetta var ekki gott, en eins og allir aðrir sá maður háan tékka úti við sjóndeildarhringinn, sem réttlætti allt.“

Spurður hvort hann prísi sig sælan í dag segist Erling hrökkva upp um miðjar nætur með svitaperlur á enninu.

„Ég sé sjálfan mig frosinn inni í ísklumpi á aðaltorginu í Amsterdam þar sem hollenskir innistæðueigendur fá að koma með ísöxi og berja utan af mér smátt og smátt,“ segir hann í laufléttum dúr.

Hjálmar Hjálmarsson mætti einnig í prufu fyrir auglýsinguna og er ánægður með að hún fór ekki lengra.

„Ég sá alveg fyrir mér risastór auglýsingaskilti í Hollandi. Það hefði verið rosalegt að vera Icesave-maðurinn,“ segir hann.

„Þetta rifjast upp öðru hverju – ég er bara feginn.“

atlifannar@frettabladid.is