Ræktuðu kartöflur á húsþaki

„Ég og Sigríður Tulinius, fyrrum bekkjarsystir mín úr Listaháskólanum, bjuggum til lítinn garð fyrir framan gallerí Kaffistofu við Hverfisgötu í fyrrasumar. Það verkefni vatt upp á sig og við sóttum um styrk frá Evrópu unga fólksins til að gera matjurtagarð á þaki gallerísins sem væri opinn almenningi," segir Anna Hrund Másdóttir, listakona. Þær stöllur komu upp myndarlegum matjurtagarði á húsþaki við Hverfisgötu í sumar og ræktuðu þar meðal annars kál, kartöflur og kryddjurtir.

Anna Hrund segir nágranna Kaffistofunnar hafa tekið vel í verkefnið og nýttu nokkrir aðstöðuna til að rækta eigið grænmeti. „Nágrannarnir tóku mjög vel í þetta og pössuðu vel upp á garðinn þannig að hann fékk alveg að vera í friði fyrir skemmdarvörgum. Í kjölfarið kynntumst við líka nágrönnum gallerísins betur og það var mjög jákvætt. Fólk hefði samt mátt nota garðinn meira, en það breytist kannski í framtíðinni."

Um síðustu helgi var haldin uppskeruhátíð og buðu stúlkurnar þá nágrönnum sínum, vinum og vandamönnum í bragðgóða grænmetissúpu sem löguð var úr heimaræktuðu grænmeti. Innt eftir því hvort þær hyggist endurtaka leikinn að ári liðnu segist Anna Hrund ekki viss.

„Það fer náttúrulega mikill tími í að hugsa um svona garð, það þarf að vökva hann á hverjum degi og sjá um plönturnar. Ég vona frekar að við séum búnar að sá fræjum í huga fólks og að aðrir taki sig til og geri svona garða sjálfir. En maður veit aldrei, ég væri alveg til í að gera tilraun til þess að rækta eplatré næsta sumar." - sm