Lögfræði-mottur með forystu í skeggkeppni

Karlmenn hafa heldur betur snúið bökum saman í mars en ófáir karlar skarta yfirvararskeggi til stuðnings átakinu um þessar mundir. Á vefsíðu átaksins, karlmennogkrabbamein.is, hafa þúsundir manna skráð sig til leiks og safnað tæpum 9 milljónum króna í áheitum.

Hópur starfsmanna hjá prentsmiðjunni Odda eru meðal þeirra sem hafa skráð sig til leiks í liðakeppninni og ríkir mikil spenna og metnaður fyrir vænlegum skeggvexti meðal karlanna.

„Við vildum styðja við bakið á okkar mönnum og ákváðum því að kaupa skeggnælu handa öllum karlmönnum fyrirtækisins. Karlmenn hafa löngum verið útundan þegar kemur að árvekni gagnvart krabbameini og ef marka má okkar fólk þá er mikill áhugi fyrir að kippa því í lag!" Segir Hildur Björg Jónasdóttir markaðsfulltrúi hjá Odda.

Hún segir skemmtilega stemmingu hafa myndast fyrir átakinu innanhúss og hvetur önnur fyrirtæki til að styðja við átakið með svipuðum hætti.

Fleiri lið koma galvösk til keppni. Meðal annars starfsmenn Actavis og svo sjómenn frá Vestmannaeyjum eins og sjá má á meðfylgjandi myndum. Þá leiða lögmenn hjá Logos keppnina en þeir hafa safnað áheitum fyrir tæplega 300 þúsund krónur.

Skeggnælan kostar aðeins kr. 1.500 og er nú fáanleg í verslunum á höfuðborgarsvæðinu.