Ajax sektar og dæmir Suarez í bann

Hollenska knattspyrnufélagið Ajax hefur ákveðið að sekta úrúgvæska leikmanninn Luis Suarez og dæma hann í tveggja leikja bann fyrir að bíta andstæðing í leiknum gegn PSV um helgina.

Í gær var sagt frá því þegar Suarez beit Otman Bakkal, leikmann PSV, í öxlina þegar liðin gerðu markalaust jafntefli í hollensku úrvalsdeildinni um helgina.

Hollenska knattspyrnusambandið tók málið upp og gæti dæmt hann einnig í bann, rétt eins og félag hans ákvað að gera sjálft í gær.

Bannið mun þó ekki taka gildi fyrr en eftir leik Ajax gegn Real Madrid í Meistaradeildinni í kvöld.