Dregur úr vatnsflæði undan Gígjökli

Vatnsflæði undan Gígjökli jókst laust fyrir hádegi í dag en dró fljótlega úr því aftur.

Nokkur hækkun hefur mælst á vatnsyfirborði við Markarfljótsbrú.

Hreinsunarstörf halda áfram undir Eyjafjöllum. Sóttvarnalæknir sendi í dag frá sér tilmæli til þeirra sem vinna við hreinsun á þurri ösku að þeir noti öndunargrímur við störfin.

Öndunargrímur má fá á nærliggjandi heilsugæslustöð við eldgosið eða hjá almannavarnanefnd á Hvolsvelli.

Loftrými umhverfis Reykjavíkur- og Keflavíkurflugvelli hefur verið lokað fyrir blindflugsumferð í dag og hefur það valdið töluverðum röskunum á flugáætlunum.

Akureyrar- og Egilsstaðaflugvellir eru opnir allri umferð.

Athugað verður með flug til og frá Reykjavík síðar í dag. Flugfarþegum er bent á að leita sér upplýsinga hjá flugrekendum og á textavarpinu.